انا كنت عاوزة ارغى معاكم شويه النهارده فى موضوع كده اكيد بيجى فى دماغ كل واحده فينا
وخصوصا وهى قاعده تتفرج على فيلم ولا مسلسل تركى من الى بالى بالك وهى شايفه الراجل بيعامل الى بيحبها ازاى
طبعا كل واحده بينها وبين نفسها بتقعد تقارن زى الشاطره كده بينه وبين جوزها وتقول فى بالها
ياسلالالالالالالالالام لو جوزى يبقى رومانسى كده
الراجل الى انا متجوزاه ده فى كل حاجه حلوه بس ناقصه الرومانسيه دى
وتقعد تمصمص على حالها وتفتكر ايام الخطوبه وتقول راح فين الحب ده كله دلوقتى
الواحد ماكنشى يعرف ان الجواز بيقتل الحب كده
استنى بقى انتى وهيه وبلاش تعيشى الدور اوى كده ياختى
حب ايه الى اتقتل لاقدر الله ومين قالك اصلا انرومانسىه بتاعه الافلام والمسلسلات دى هى الحب بجد
ولا مين قالك ان الراجل بيقبى ايام الخطوبه حاجه وبعد الجواز بيقبى حاجه تانيه خالص
اهدى بقى كده واسمعى الكلمتين دول منى وحطيهم حلقه فى ودنك
انا بقى هقولك على الخلاصه عشان ترتاحى وماتعيشيش الدور اوى كده
اعرفى بقى ان الرومانسيه واللهفه والشوق الى بتقبى فى الراجل ايام الخطوبه ظاهره دى بتحركها حاجه واحده بس
عارفه ايه هى ....هقولك بس ماتتخضيش
الرغبه الجنسيه
ايوه...الرغبة الجنسيه...
سامعاكى يلى بتشتمى وتقولى ايه الست المتخلفه الرجعيه دى
بس صدقونى هى دى الحقيقه الى احنا مش فاهمنها
الراجل لما بيحب واحده اول حاجه بيفكر فيها هوالجنس
طبعا هو مش اختارك عشان كده بس
انتى عاجبتيه من ناحية النسب والشكل والاهل والحاجات دى كلها بس انا بتكلم عن اللهفه الى بتقبى موجوده ايام الخطوبه وبتختفى تقريبا بعد الجواز
اللهفه دى ورغبته فيكى هى الى بتحركه وتخليه رومانسى ويقعد يدلع فيكى واشى وردة حمرا لا دبدوب ابيض لا ازازة برفيوم لا كلام ناعم ونظرات رومانسيه
وكل مايحبك اكتر ويتعود عليكى تزداد الرغبه دى عنده فتزداد الرومانسيه اكتر
اول مايتجوز الرغبه دى ببتتشبع عنده خلاص وعارف انه وقت مايشتاقلك حيلاقيكى قدامه
فبيبدا بقى يظهر الحب الحقيقى الى بعد الجواز
نعم نعم امال الرومانسيه دى كلها كانت ايه مش حب يعنى
احب اقولك ان الحب الحقيقى تدورى عليه بعد الجواز مش ايا م الخطوبه
الحب الحقيقى بيقبى اغلبه افعال مش كلام
لما يفسحك فسحه جميله...ده حب
لما تلاقيه قلقان عليكى لما تتاخرى...ده حب
لما تلاقيه بيشتريلك حاجه نقصاكى ...ده حب
لما تلاقيه يشيل البيت وانت تعبانه ...ده حب
لما يقعد يحكى معاكى فى امور الحياة ...ده حب
لما يشتكيلك من حاجه تعباه ومضايقاه ....ده حب
لما تلاقيه بيشكر فى طبيخك ...ده حب
لما يعامل اهلك كويس ...ده حب
حاجات كتير اوى الستات مابتقباش شايفاها وحاسه ان ازواجهم مش بيحبوهم عشان مش بيقوللوهم كلام رومانسى
وتحس ان جوزها راجل قلبه قاسى ومعندهوش عواطف ومش حاسس بمشاعرها
اوعى تصدقى شغل الافلام العربى بتاعتنا ده ..شغل تامر حسنى والسقا ده شغل تمثيل مش اكتر
واراهنك لو هما بيعاملوا مراتاتهم زى مابيجى فى الافلام كده
مش عشان الرجاله وحشه...لا عشان هى دى سنه الحياة
لازم نقدر المشاكل والاعباء الى على الراجل...هو مش مطالب كل شويه يجى ويقولك انا بحبك ويقعد يسبل فى عينيكى
ومش اول مايجى يوم عيد ميلادك وينساه....تعمليها مصيبه ومشكله ويبقى يوم مهبب عليه وعلى الى خلفوه
هو فيه الى مكفيه....واتحداكى لو هو اصلا يبقبى فاكر النهارده كام فى الشهر
ياستى مادام انتى شطوره كده وبتحفظى التواريخ
اعمليها مفاجاه...واى يوم مناسبه ليكم او حتى عيد ميلادك...اعملى كده تورته حلوه زيك وفاجئيها بيه
هتلاقيه مبسوط وفرحان ويقولك كل سنه وانتى طيبه ياحياتى معلش والله نسيت
قولوله ولا يهمك ياحبى المهم ان عيد ميلادى كل سنه تكون جمبى دى عندى بالدنيا ومافيها
وممكن اوى تلاقيه مفاجئك بهديه جميله
ويفضل شايلك طول عمرك انك ست عاقله ومش نكديه ومقدره ظروف جوزكالحاجات دى صدقينى هى الى بتكبر الست فى عيون جوزها ويقوى حبه ليها
طبعا ان مش قصدى بكلامى ده ان الرومانسيه غلط بعد الجواز ....بس خليها تيجى كده بظروفها
مره يكون مزاجه رايق ويوم جميل تلاقيه رجع زكريات الخطوبه وعيشته ليله حلوه مع بعض
لكن انك تحسى ان جوزك مقصر معاكى وناقصك حاجه مهمه ومش سعيده فى حياتك
وكل شويه عماله تحطيه فى اختبارات...ياترى هيفتكر عيد جوزنا
ياترى هيقولى سلامتك...ياترى هيقولى وحشتينى
وتوقفى بقى حياتك على كده....والنكد والشكاوى تشتغل
لا طبعا.....عيشى حياتك واتبسطى وماتشغليش دماغك بالرومانسيه ....خليها تيجى وقت ماتيجى بيقبى طعمها احلى بدل ماتقعدى مستنياها وموقفه حياتك وعلاقتك مع جوزك عليها
واوعى تخلى الشيطان يلعب فى دماغك لسمح الله ويحسسك انك عايشه مع راجل مابيحسش وماعندهوش مشاعر وراجل مايتعشرشى
وتلاقى هوب الشيطان يخليكى تدورى على المشاعر ويوقعك فى واحد يتعرف عليكى على النت ويقعد بقى يتغزل فيكى ويشتغل عليكى
وانتى زى الهبله تصدقيه وتقولى ياسلام لو كنت جوزى....
فوقى لنفسك واوعى تغضبى ربك....وماتشيليش جوزك حمل فوق حمله وتنكدى عليه حياته وحياتك
واعرفى كويس ان فى فرق كبير بين حب العاشق الولهان المحروم لحبيبته من غير اى مسئوليه او هموم...وبين حب الزوج لزوجته الى هى سكنه وبيته وام اولاده والى عنده مسئوليه كبيره اتجاههم
واعرفى ان رسالتك فى الحياة اكبر من كده بكتير....ولازم ماتخليش اى حاجه صغيره تعكرها او تخلق مشاكل بينكم
كلمه بقى صغيورة قبل ماامشى لحسن عارفه انى طولت عليكم اوى ورغيت كتير
اوعى مره وانتى قاعده مع جوزك بتتفرجى على التلفزيون وشفتى مشهد رومانسى تقومى ممصمصه شفايفك وقايلاله
شايف الرجاله بتعمل ايه
انتى كده بتجرحى رجولته وبتعملى شرخ كبير فى علاقتكم لما يحس انه مش مالى عينك ومكفيكى
بالعكس انتى لازم دايما تحسسيه انك عارفه قد ايه هو بيحبك وقد ايه نفسه يعملك حاجات كتير بس الظروف غصبن عنه
واحب اختم فى النهايه باحلى الكلام من قرءانا العظيم
بسم الله الرحمن الرحيم : " وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ "
صدق الله العظيم
ليست هناك تعليقات:
إرسال تعليق